 |
| ព្រះសង្ឃវត្តច័ន្ទសោភ័ណព្រែកអណ្តើក កំពុងធ្វើពិធីស្រង់ទឹកព្រះពុទ្ធបដិមានៅថ្ងៃបុណ្យចូលឆ្នាំថ្មីប្រពៃណី។ |
តាមព្រះតេជគុណឡឹមច័ន្ទសំណាង-ពហុស្សូតវត្តច័ន្ទសោភ័ណព្រែកអណ្តើក ភូមិព្រែកអណ្តើក ឃុំថាញ់ភូ ស្រុកមីស្វៀង (សុកត្រាំង) ស្រង់ទឹកព្រះជា ពិធីកិច្ចមួយដែលមានពុទ្ធបរិស័ទចូលរួមយ៉ាងកុះករក្នុងពិធីបុណ្យចូលឆ្នាំថ្មីប្រពៃណី នោះគឺពិធីស្រង់ទឹកព្រះពុទ្ធបដិមា។ ស្រង់ទឹកព្រះពុទ្ធបដិមាជាពិធីដ៏សំខាន់បំផុត ហើយបានប្រារព្ធធ្វើឡើងនៅថ្ងៃវារៈឡើងស័ក (ថ្ងៃទី៣នៃពិធីបុណ្យចូលឆ្នាំថ្មី) ជាពិធីមួយបង្ហាញពីជំនឿរបស់ពុទ្ធបរិស័ទមានការគោរពចំពោះព្រះពុទ្ធសាសនា ទន្ទឹមនឹងនោះ បួងសួងសុំសេចក្តីសុខដល់ខ្លួននិងគ្រួសារក្នុងឆ្នាំថ្មី។ ចែករំលែកអំពីរពិធីកិច្ចស្រង់ទឹកព្រះ ព្រះតេជគុណឡឹមច័ន្ទសំណាងមានសង្ឃដីកា៖ មុននឹងចាប់ផ្តើមធ្វើពិធីស្រង់ទឹកព្រះពុទ្ធបដិមា ព្រះសង្ឃនិងគណៈកម្មការវត្តនឹងរៀបចំរបស់របរសម្ភារៈចាំបាច់ ឆ្លងតាមនោះ មាមីងពុទ្ធបរិស័ទមកវត្តត្រូវកាន់ផ្តិលទឹកមកតាម (ទឹកមានផ្កាភ្ញីទឹកអប់) រូបព្រះពុទ្ធបដិមាបាននិមន្តយកមកដាក់តម្កល់នៅទីដ៏គួរសម ដើម្បីងាយស្រួលធ្វើពិធីស្រង់ទឹកព្រះ (វត្តខ្លះគេចាត់តាំងស្រង់ទឹកព្រះនៅក្នុងព្រះវិហារ ឧបដ្ឋានសាលាឬកុដិ។ល។)។ ពេលពុទ្ធបរិស័ទមកវត្តជួបជុំគ្រប់គ្នា ព្រះសង្ឃចាប់ផ្តើមធ្វើពិធីកិច្ចនមស្ការព្រះរតនត្រ័យដើម្បីរំលឹកដល់គុណព្រះសម្មាសម្ពុទ្ធដែលបានត្រាស់ដឹង ផ្សព្វផ្សាយសាសនានិងដឹកនាំពុទ្ធបរិស័ទ គោរពប្រតិបត្តិល្អនូវធម៌អាថ៌វិន័យ រស់នៅត្រូវតែសាងនូវកុសលធម៌។ បន្ទាប់ពីពិធីនមស្ការរួចរាល់ឈានដល់ពិធីស្រង់ទឹកព្រះ ព្រះសង្ឃដែលមានវស្សាចាស់នឹងធ្វើពិធីស្រង់ទឹកព្រះមុន ទើបដល់ព្រះភិក្ខុសង្ឃនិងសាមណេរ។ បន្ទាប់ពីព្រះសង្ឃបានស្រង់ទឹកព្រះរួច ដល់គណៈកម្មការនិងពុទ្ធបរិស័ទ។ ពូថាច់មិញស៊ើង ពុទ្ធបរិស័ទវត្តព្រែកអណ្តើកចែករំលែក៖ រៀងរាល់ឆ្នាំដល់ពិធីបុណ្យចូលឆ្នាំថ្មី ខ្ញុំតែងទៅវត្តដើម្បីចូលរួម ពិធីស្រង់ទឹកព្រះពុទ្ធបដិមា បួងសួងសុំសេចក្តីសុខដល់ខ្លួននិងក្រុមគ្រួសារ។
ដោយចិត្តស្មោះស្ម័គ្រ ក្នុងពេលធ្វើពិធីស្រង់ទឹកព្រះពុទ្ធបដិមា ពុទ្ធបរិស័ទតែងតែយកទឹកលាយជាមួយផ្កាភ្ញីទឹកអប់ដើម្បីស្រោចស្រពដល់ព្រះពុទ្ធបដិមា។ ពិធីស្រង់ព្រះមិនសំដៅតែចំពោះព្រះពុទ្ធបដិមាតែមួយមុខទេ នៅទាំងមានអ្នកមានគុណដូចៈ ជីដូនជីតា ឪពុក ម្តាយ។ល។ ដែលគេធ្លាប់ហៅថាព្រះរស់ ជាព្រះដែលតែងតែនៅក្បែរមើលថែយើងរហូតតាំងពីតូចក្រូចឆ្មា ដូច្នេះ គួរតែសម្តែងនូវការដឹងគុណ ការតបស្នងសងគុណចំពោះអ្នកមានគុណ។ អាស្រ័យហេតុនោះ មាមីងខ្មែរមានជំនឿ តៗគ្នា យូរមកហើយថាស្រង់ទឹកព្រះពុទ្ធបដិមានិងអ្នកមានគុណសុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជំគ្រប់ក្រុមគ្រួសារ កាត់ផ្តាច់កម្មអកុសល លះបង់បាបអកុសលចាស់ៗ ចោល ហើយសាងនូវកុសលថ្មី។
ឃើញថា ពិធីស្រង់ទឹកព្រះតាមកិច្ចព្រះពុទ្ធសាសនារបស់ជនរួមជាតិខ្មែរមានតួនាទីយ៉ាងសំខាន់ក្នុងការបង្ហាញពីការដឹងគុណចំពោះព្រះសម្មាសម្ពុទ្ធដែលផ្តល់តម្លៃនៃកសាងសីលធម៌របស់មនុស្ស។ ជាមួយនឹងអត្ថន័យនៃការបួង សួងសុំសេចក្តីសុខ លាងជម្រះនូវអកុសលក្នុងឆ្នាំចាស់ដើម្បីឆ្នាំថ្មីសូមឱ្យជួបតែសំណាងល្អនិងសុភមង្គល៕
ថាញ់វ៉ាង - លីហាន់
Thông tin bạn đọc
Đóng Lưu thông tin