 |
| ទិដ្ឋភាពពិធីបុណ្យមាឃបូជានៅវត្តព្រែកអណ្តើក ឃុំថាញ់ភូ ស្រុកមីស្វៀង (សុកត្រាំង) |
តាមធម្មតា បុណ្យនេះប្រព្រឹត្តឡើងនាថ្ងៃ១៥កើត ខែមាឃ។ បុណ្យមាឃបូជាបានគេប្ររព្ធឡើងដើម្បីរំលឹកព្រឹត្តិការណ៍ចតុរង្គសន្និបាតប្រកបដោយអង្គ៤៖
ទីមួយ គឺប្រារព្ធនៅថ្ងៃពេញបូណ៌មី ខែមាឃ។ ទី២ ចតុរង្គសន្និបាតមានភិក្ខុ១.២៥០អង្គមកចូលរួមដោយមិនបាននិមន្តឬណាត់មុន។ ទី៣ ភិក្ខុទាំងនោះសុទ្ធតែជាឯហិភិក្ខុ។ ទី៤ ព្រះភិក្ខុទាំងអស់សុទ្ធតែជាព្រះអរហន្ត។
ក៏ក្នុងថ្ងៃនោះដែរ ពេលព្រះអរហន្តមកជួបជុំហើយ ព្រះសម្មាសម្ពុទ្ធសម្តែងឱវាទបាតិមោក្ខស្តីអំពីខ្លឹមសារ ជាស្មារតីរួមនៃព្រះធម៌គឺ៖ មិនធ្វើបាបទាំងពួង បំពេញនូវកុសល អប់រំចិត្តឱ្យស្អាតផូរផង់។
ហើយថ្ងៃនេះក៏ជាថ្ងៃដែលព្រះសារីបុត្តនិងព្រះមោគ្គល្លានបានតែងតាំងជាព្រះអគ្គសាវ័កឆ្វេង ស្តាំនាឱកាសនេះដែរ។
ក្រៅពីនេះ ក្នុងថ្ងៃពេញបូណ៌មីខែមាឃ គឺ៣ខែមុនចូលបរិនិព្វាន ព្រះសម្មាសម្ពុទ្ធទ្រង់យល់ព្រមពាក្យអារាធនារបស់មារ ព្រះអង្គទ្រង់ប្រកាសថាដាក់អាយុសង្ខារនឹងយាងចូលនិព្វានក្នុង៣ខែខាងមុខ។
បុណ្យមាឃបូជាមានអត្ថន័យពិសេសជាងពិធីបុណ្យផ្សេងៗ ព្រោះថានេះជាឱកាសទាំងបព្វជិតទាំងគ្រហស្ថរួមគ្នាប្រារព្ធដោយចិត្តគោរពព្រះសម្មាសម្ពុទ្ធនិងពាក្យប្រៀនប្រដៅរបស់ព្រះពុទ្ធទ្រង់ញាណ។
តាមទំនៀមរបស់ពុទ្ធសាសនាទក្ខិណនិកាយខ្មែរ នាពេលព្រឹក ពុទ្ធបរិស័ទយកភត្តាហារប្រគេនព្រះសង្ឃ វត្តខ្លះចាត់តាំងពិធីរាប់បាត្រ។ ពេលព្រលប់ក្នុងថ្ងៃដដែល ពុទ្ធបរិស័ទប្រមូលផ្តុំគ្នានៅវត្ត ពេលជួបជុំគ្នាហើយ អ្នកទាំងអស់គ្នារៀបចំទៀនធូប ផ្កានិងគ្រឿងក្រអូបដើម្បីបូជាដល់ព្រះពុទ្ធ។ ក្រោយមក គេនឹងត្រាប់ជាជួរដើម្បីដើរប្រទក្សិណជុំវិញព្រះវិហារ៣ជុំដើម្បីសម្តែងនូវការគោរពចំពោះព្រះរតនត្រៃ។
ដំបូង ព្រះសង្ឃនឹងផ្តើមនមស្ការព្រះរតនត្រៃ។ បន្ទាប់មក ពុទ្ធបរិស័ទនឹងនមស្ការតាមក្រោយ។ បន្ទាប់មកទៀត ព្រះសង្ឃឬអាចារ្យមួយរូបនឹងសូត្រគាថាមាឃបូជា ហើយឱ្យអ្នកគ្រប់គ្នាសូត្រតាម ដើម្បីរំលឹកបណ្តាព្រឹត្តិការណ៍សំខាន់ទាក់ទិនដល់ថ្ងៃបុណ្យនេះ។
ក្រៅពីនមស្ការ សរសើរគុណត្រៃរតន៍ ព្រះសង្ឃនឹងសម្តែងអំពីពុទ្ធប្រវត្តិដើម្បីឱ្យពុទ្ធបរិស័ទយល់ឱ្យកាន់តែច្បាស់អំពីមាគ៌ានៃព្រះពុទ្ធសាសនា។
ពីសម័យដើម បុណ្យមាឃបូជាតែងអូសបន្លាយអស់មួយរាត្រីដើម្បីសម្តែងសេចក្តីគោរពចំពោះពុទ្ធគុណ។ ព្រឹកឡើង គឺថ្ងៃ១រោចខែមាឃ ពុទ្ធបរិស័ទប្រគេនភត្តដល់ព្រះសង្ឃហើយឆ្លងពិធីបុណ្យមាឃបូជា។
គ្រូអាចារ្យយ័ញកេត គណៈកម្មការវត្តព្រែកអណ្តើក ឃុំថាញ់ភូ ស្រុកមីស្វៀង (សុកត្រាំង) ឱ្យដឹង៖ បុណ្យមាឃបូជាបានព្រះសង្ឃនិងពុទ្ធបរិស័ទគ្រប់វត្តចាត់តាំងដើម្បីរំលឹកបណ្តាព្រឹត្តិការណ៍សំខាន់ៗមានតាំងពីសម័យព្រះពុទ្ធទ្រង់គង់ធរមាន ដើម្បីសរសើរគុណព្រះត្រៃរតន៍ រំលឹកពុទ្ធគុណ។ ក៏ប៉ុន្តែ បើប្រៀបជាមួយពិធីបុណ្យវិសាខបូជា ចំនួនមនុស្សចូលរួមមានតិចជាងនិងទ្រង់ទ្រាយតូចជាង។
វឌ្ឍា
Thông tin bạn đọc
Đóng Lưu thông tin