វត្តអូរជុំអារាមព្រែកចេក ឃុំវិញគ្វើយ ទីរួមខេត្តង៉ាណាំ បានកសាងកាលឆ្នាំ១៧២៨ ឆ្លងកាត់១៤ជំនាន់ព្រះចៅអធិការ បច្ចុប្បន្ន ព្រះតេជគុណស៊ើងភឿកឡើយ ជាព្រះចៅអធិការទី១៥។ ថ្វីដ្បិតតែ វត្តនេះស្ថិតនៅតំបន់ជនបទដែលពុទ្ធបរិស័ទមានចំនួនតិច បើធៀបជាមួយនឹងវត្តទក្ខិណនិកាយខ្មែរដទៃ ប៉ុន្តែវត្តអូរជុំអារាមព្រែកមានភាពលេចធ្លោនិងតែងតែបានអ្នករាល់គ្នាដឹងឮ ព្រោះជាវត្តដែលសម្បូរដោយប្រពៃណីបដិវត្តន៍។ សំណេះសំណាលជាមួយនឹងយើងខ្ញុំ ព្រះតេជគុណស៊ើងភឿកឡើយ-ព្រះចៅអធិការវត្តអូរជុំអារាមព្រែកចេក ឃុំវិញគ្វើយ ទីរួមខេត្តង៉ាណាំ (សុកត្រាំង) មានសង្ឃដីកា៖ តាមការរៀបរាប់របស់មាមីង មូលហេតុដែលបុព្វបុរសដាក់ឈ្មោះវត្តអូរជុំអារាមព្រែកចេក ព្រោះពីមុនមានស្រះ ព្រែកប្រឡាយជាច្រើននៅជុំវិញវត្ត។ ពិសេស នៅលើតាមមាត់ព្រែកមានដាំដើមចេកជាច្រើន មាមីងតែងតែមកកាប់ផ្លែនិងដើមចេកសម្រាប់ចម្អិនធ្វើជាម្ហូបអាហារ។ តាំងពីនោះ បុព្វបរុសបានដាក់ឈ្មោះថាវត្តអូរជុំអារាមព្រែក។
អស់រយៈកាលជាច្រើនឆ្នាំរងទុក្ខលំបាក វត្តអូរជុំអារាមព្រែកចេកត្រូវរងការឈឺចាប់ បាត់បង់ក្នុងសង្គ្រាមតស៊ូប្រឆាំងបារាំងនិងអាមេរិក ប៉ុន្តែដោយមានការតស៊ូនិងការប្រឹងប្រែង ព្រះចៅអធិការគ្រប់ជំនាន់បានកៀរគរមាមីងពុទ្ធបរិស័ទដើម្បីជួសជុល កសាងវត្ត។ ដោយទទួលបានទំនុកចិត្តពីពុទ្ធបរិស័ទនិងរដ្ឋអំណាចភូមិភាគ ព្រះតេជគុណស៊ើងភឿកឡើយមិនបង្អង់ក្នុងការកែលម្អស្ថាបត្យកម្ម ទន្ទឹមនឹងនោះ បណ្តុះបណ្តាលធនធានមនុស្សសម្រាប់វត្តនិងភូមិស្រុក។ នៅខែមិថុនា ឆ្នាំ២០២១ ព្រះតេជគុណស៊ើងភឿកឡើយនិងគណៈកម្មការ ព្រមទាំងមាមីងពុទ្ធបរិស័ទទាំងអស់យល់ព្រមសាងសង់ឧបដ្ឋានសាលាថ្មី។ តាំងពីនោះ សប្បុរសជននិងពុទ្ធបរិស័ទជិតឆ្ងាយបានគប់វាល់កសាងសម្រេចនិងដាក់ឱ្យប្រើប្រាស់នៅថ្ងៃទី២០ មករា ឆ្នាំ២០២៣។ ឧបដ្ឋានសាលាបានសាងសង់ដោយបេតុងរឹងមាំ ប្រកបដោយក្បូរក្បាច់រចនាតាមប្រពៃណីព្រះពុទ្ធសាសនាទក្ខិណនិកាយខ្មែរ សរុបថវិកាជាង៥ពាន់លានដុង។
 |
| ឧបដ្ឋានសាលាវត្តអូរជុំអារាមព្រែកចេក។ |
ពិសេស ដោយមានបំណងចង់ជំនួសឱ្យសំណង់ដែលចាស់ទ្រុឌទ្រោម ការកសាងថ្មីដើម្បីបម្រើសេចក្តីតម្រូវការក្នុងសកម្មភាពជំនឿសាសនារបស់មាមីង មានភាពសប្បាយរីករាយនិងសុវត្ថិភាព វត្តអូរជុំអារាមព្រែកចេកបានសង់ព្រះវិហារថ្មីជំនួសឱ្យព្រះវិហារចាស់ទ្រុឌទ្រោមនិងបានប្រារព្ធចាត់តាំងពិធីបុណ្យបញ្ចុះខណ្ឌសីមានៅថ្ងៃទី២២ មីនា ឆ្នាំ២០២៣។ បន្ទាប់ពីបានកសាងអស់រយៈពេលជាង៦ឆ្នាំ ព្រះវិហារថ្មីវត្តអូរជុំអារាមព្រែកចេកបានសម្រេចរួចរាល់ មានបណ្តោយ២០ម៉ែត្រ ទទឹង១១,៥ម៉ែត្រ កម្ពស់២១ម៉ែត្រ សរុបថវិកា៤ពាន់៣៥៤លានដុង។ ក្នុងនោះ ខេត្តសុកត្រាំងឧបត្ថម្ភ១ពាន់១៥០លានដុង ថវិកាដែលនៅសល់ពុទ្ធបរិស័ទរួមគ្នាគប់វាល់។
 |
| ព្រះវិហារថ្មីវត្តអូរជុំអារាមព្រែកចេក។ |
ថ្វីដ្បិតតែ ជាវត្តនៅតំបន់ឆ្ងាយដាច់ស្រយាល ប៉ុន្តែក្រោមការដឹកនាំរបស់ព្រះតេជគុណស៊ើងភឿកឡើយ ព្រះសង្ឃនិងពុទ្ធបរិស័ទតែងគោរពប្រតិបត្តិនូវឱវាទរបស់ព្រះពុទ្ធ។ ពិសេស គ្រប់គ្នាតែងអនុវត្តល្អនូវគោលការណ៍ គោលនយោបាយរបស់បក្ស ក្រឹត្យច្បាប់របស់រដ្ឋ ចូលរួមកសាងជនបទថ្មី ចលនាកសាងផ្លូវជនបទ រួមគ្នាបំពេញកុសលធម៌ ជួយដល់គ្រួសារដែលមានស្ថានភាពលំបាក។ តាមពូយ័ញស្វឹង ជាសមាជិកគណៈកម្មការវត្តអូរជុំអារាមព្រែកចេក ឃុំវិញគ្វើយ ទីរួមខេត្តង៉ាណាំ (សុកត្រាំង) ឱ្យដឹង៖ រៀងរាល់ឆ្នាំ ក្រោមការដឹកនាំរបស់ព្រះតេជគុណស៊ើងភឿកឡើយ ក្រៅពីធ្វើពិធីកិច្ចសាសនាប្រពៃណីរបស់ជនជាតិ វត្តក៏បានបើកថ្នាក់បង្រៀនអក្សរខ្មែរដល់ប្អូនៗជនជាតិនារដូវវិស្សមកាលរយៈពេល៣ខែ ថ្នាក់រៀនក៏មានការចូលរួមរបស់ប្អូនៗជាជនជាតិគិញនិងហ្វា។ ទន្ទឹមនឹងនោះ ក្នុងឱកាសបុណ្យទានធំៗ វត្តតែងអប់រំពុទ្ធបរិស័ទរួមគ្នាថែរក្សាវប្បធម៌ ទំនៀមទម្លាប់ប្រពៃណី ចលនាកូនចៅខិតខំរៀនសូត្រ ឈានឡើងក្នុងការផលិត មិនចូលរួមក្នុងអំពើអបាយមុខសង្គម។ តាំងពីនោះ ភូមិស្រុកបាននសុខសាន្តត្រាណ សប្បាយរីករាយ មាមីងរួមគ្នាថែរក្សាវប្បធម៌ ភាសា អក្សររបស់ជនជាតិនិងកាន់តែរឹតចំណងសាមគ្គីភាពរវាងបងប្អូនរស់នៅជាមួយគ្នា។
ឆ្លងកាត់អស់រយៈពេលជិត៣០០ឆ្នាំ ដោយមានការសាមគ្គីរបស់ព្រះសង្ឃ គណៈកម្មការវត្ត ពុទ្ធបរិស័ទនិងរដ្ឋអំណាចភូមិភាគ វត្តអូរជុំអារាមព្រែកចេកបាននិងកំពុងក្លាយជាកន្លែងដ៏ភ្លឺស្វាងនៃសហគមន៍ ជាកន្លែងផ្សព្វផ្សាយស្មារតីមេត្តាករុណារបស់ព្រះពុទ្ធសាសនា៕
វឌ្ឍា
Thông tin bạn đọc
Đóng Lưu thông tin