 |
| ទូកគែហ៊ៅវត្តព្រែកតាគួន ឃុំថាញ់គ្វើយ ស្រុកមីស្វៀង (សុកត្រាំង) |
ទូកគែហ៊ៅតែងបានជនរួមជាតិខ្មែរណាមបូហៅក្លាយទៅជា “កាហ៊ៅ” ជាទូទៅតែងបានធ្វើពីឈើគគីរលុងទាំងដើម។ ជាងធ្វើទូកដាប់លុងទៅជាទូកមានប្រវែងពី១៥-២៥ម៉ែត្រ ទទឹង១,៥-២ម៉ែត្រ។ គែហ៊ៅគឺជាទូកលុង ដូច្នេះ ទូកមានភាពរឹងមាំណាស់ លក្ខណៈពិសេសរបស់ទូកគែហ៊ៅគឺមានដំបូលបាំងភ្លៀង ក្តៅ ហើយមានឆ្លាក់ក្បូរក្បាច់រចនាយ៉ាងល្អប្រណីត ស្តែងឡើងនូវថ្វីដៃដ៏ប៉ិនប្រសប់របស់សិប្បករធ្វើទូកក្នុងសម័យនោះ។ បណ្តាក្បូរក្បាច់ឆ្លាក់លើទូកជាទូទៅមានអត្ថន័យខាងជំនឿផ្លូវចិត្តដូច ផ្កាឈូក នាគ មករនិងរូបទេសភាពមួយចំនួនទៀត។ ប្រការទាំងនោះសម្តែងឡើងនូវជំនឿនិងលក្ខណៈវប្បធម៌ពិសេសរបស់ជនរួមជាតិខ្មែរ ផ្សារភ្ជាប់នឹងជីវភាពស្មារតីរបស់សហគមន៍។
 |
រូបចម្លាក់លើទូកគែហ៊ៅវត្តព្រែកតាគួន ឃុំថាញ់គ្វើយ ស្រុកមីស្វៀង (សុកត្រាំង)
សិល្បករឆ្នើម-មហាបរិញ្ញាឡឹមវិញភឿង - នាយករងស្ថានីយវិទ្យុ-ទូរទស្សន៍សុកត្រាំងបានឱ្យដឹង៖ កាលពីតូច ក្នុងពិធីបុណ្យអកអំបុក-ប្រណាំងទូកងបានចាត់តាំងនៅព្រែកអំពូយារ ពេលនោះ ខ្ញុំបានឃើញផ្ទាល់ភ្នែកនូវទូកគែហ៊ៅបានបណ្តែតតាមទឹក ក្នុងពេលយប់បញ្ចេញពន្លឺភ្លឺចិញ្ចាចនឹងគួរឱ្យចាប់អារម្មណ៍។ ឆ្លងតាមសកម្មភាពវប្បធម៌នេះ រូបភាពទូកគែហ៊ៅបានដក់ជាប់ក្នុងអារម្មណ៍របស់ខ្ញុំ ដោយលក្ខណៈល្អឯកនេះ។
ក៏ប៉ុន្តែ តាមពេលវេលា រូបភាពល្អឆើតរបស់ទូកគែហ៊ៅនោះមានការផ្លាស់ប្តូរ ពេលសង្គមមានការអភិវឌ្ឍនិងជីវភាពរបស់សហគមន៍មានភាពវិវឌ្ឍ។ ពេលផ្លូវគមនាគមន៍មួយថ្ងៃកាន់តែរីកចម្រើន ការធ្វើដំណើរតាមផ្លូវទឹកបានថយចុះបណ្តើរៗ តាមនោះ ធ្វើឱ្យមុខងាររបស់ទូកគែហ៊ៅវិវត្តតាម។ ពេលខ្លះ ទូកគែហ៊ៅសម្រាប់តែដឹកព្រះតេជគុណព្រះចៅអធិការក្នុងពិធីបុណ្យប្រណាំងទូកង ដើម្បីបញ្ជាការក្រុមទូកងនិងដឹកជញ្ជូនគ្រឿងបរិភាគ។ ក្រោយមកទៀត ទូកគែហ៊ៅក៏អវត្តមាននៅដងព្រែកក្នុងពិធីបុណ្យប្រណាំងទូកតែម្តង។ គេបានយកទូកប៉ុកចាយឬទូកស្នៅសម្រាប់ដឹកជញ្ជូនចំណីអាហារនិងទឹកផឹកសម្រាប់ក្រុមទូកងជំនួសឱ្យទូកគែហ៊ៅវិញ ប្រការនេះធ្វើឱ្យគេយល់ច្រឡំថាទូកគែហ៊ៅគ្រាន់តែជាទូកសម្រាប់ដឹកបាយ (ទូកបាយ)។
ព្រះតេជគុណលីវហ្វៀង-ព្រះចៅអធិការវត្តបឹងកក់ ឃុំភូមី ស្រុកមីទូមានសង្ឃដីកា៖ កាលពីមុន ទូកគែហ៊ៅសម្រាប់ប្រើក្នុងការដឹកព្រះចៅអធិការនិងព្រះសង្ឃទៅមក ក្រោយមកវត្តបានដោះដំបូលចេញ និងយកទូកគែហ៊ៅសម្រាប់ដឹកសម្ភារៈកសាងវត្តដូច ខ្សាច់ ស៊ីម៉ងត៍ ដែក។ល។
ការរផ្លាស់ប្តូរមុខងារនិងរបៀបប្រើប្រាស់ធ្វើឱ្យបាត់បង់តម្លៃដើមរបស់ទូកគែហ៊ៅ។ ពេលមិនបានប្រើប្រាស់ជាប្រចាំ ទុកចោលហើយមិនបានជួសជុលត្រឹមត្រូវបណ្តាលឱ្យទូកខូចខាតយ៉ាងខ្លាំង។ គិតស្មានថាទូកគែហ៊ៅនឹងត្រូវគេបំភ្លេច ក៏ក្នុងឆ្នាំ២០១៦ ព្រឹត្តិការណ៍សំខាន់មួយកត់ចំណាំការវិលត្រឡប់វិញរបស់ទូកគែហ៊ៅ គឺពេលខេត្តសុកត្រាំងចាត់តាំងពិធីស្តារឡើងវិញទូកគែហ៊ៅ ដើម្បីលើកតម្កើងនិងអភិរក្សអត្តសញ្ញាណវប្បធម៌ប្រពៃណីរបស់ជនរួមជាតិខ្មែរ។ បណ្តាវត្តមានទូកគែហ៊ៅបានចាប់ផ្តើមជួសជុលទូកឡើងវិញ ដើម្បីចូលរួមសម្តែងបង្ហាញលើដងព្រែក Maspero ក្នុងឱកាសបុណ្យអកអំបុក-ប្រណាំងទូកងរៀងរាល់ឆ្នាំ។
ព្រះឧបជ្ឈាយ៍យឿងណេ ព្រះចៅអធិការវត្តព្រែកតាគួនមានសង្ឃដីកា៖ ទូកគែហ៊ៅរបស់វត្តបានប្រើប្រាស់ក្នុងអំឡុងឆ្នាំ១៩៧៨និង១៩៧៩ ក្នុងពិធីបុណ្យប្រណាំងទូកងនៅព្រែកអំពូយារ។ ក្រោយមកទូកនេះមិនបានប្រើប្រាស់ទៀតទេ ដល់ឆ្នាំ២០១៦ ពេលខេត្តមានផែនការស្តារឡើងវិញ ទើបវត្តចាប់ផ្តើមជួសជុលទូក ដើម្បីយកទៅសម្តែងបង្ហាញក្នុងពិធីបុណ្យអកអំបុកតាំងពីពេលនោះរហូតមក។
ការស្តារឡើងវិញនូវទូកគែហ៊ៅមិនត្រឹមតែជាការធ្វើឱ្យរស់ឡើងវិញនូវកេរដំណែលវប្បធម៌ដែលគិតថានឹងបាត់បង់នោះទេ ហើយថែមទាំងជាការបញ្ជាក់នូវការយកចិត្តទុកដាក់របស់រដ្ឋអំណាចគ្រប់ថ្នាក់និងប្រជាជននៅភូមិភាគក្នុងការអភិរក្សកេរដំណែលវប្បធម៌របស់ជនរួមជាតិខ្មែរ ជួយឱ្យអ្នកជំនាន់ក្រោយយល់ច្បាស់ពីតម្លៃវប្បធម៌ប្រពៃណី ញ៉ាំងឱ្យមោទនភាពនិងស្មារតីរក្សាកេរដំណែលជនជាតិកាន់តែមុតមាំ ហើយជួយឱ្យជនរួមជាតិខ្មែរបានដឹងនូវកេរដំណែលដ៏ពិសេសរបស់ជនជាតិខ្លួន។
វឌ្ឍា-សុផល
Thông tin bạn đọc
Đóng Lưu thông tin