 |
| ក្រុមទូកងវត្តសិរីឧត្តមប្រជុំវង្សាព្រែកតាគួនហ្វឹកហាត់ ដើម្បីចូលរួមប្រកួតនាពិធីបុណ្យអកអំបុក នាពេលខាងមុខ។ |
រៀងរាល់ពេលថ្ងៃរសៀលចាប់ពីម៉ោង៤ដល់ម៉ោ៦ល្ងាច នៅទីធ្លាវត្តពោរពេញដោយសំឡេងផ្លុំកញ្ចែនិងចង្វាក់អុំយ៉ាងខ្ជាប់ខ្ជួន បង្កបរិយាកាសហ្វឹកហាត់យ៉ាងផ្តូរផ្តាច់។ បណ្តាកីឡាករតាំងពីក្មេងដល់វ័យចំណាស់រួមគ្នាហ្វឹកហាត់យ៉ាងម៉ត់ចត់មុនពេលចុះហាត់បន្ទា។
ពូគីមហុងហ្វឹង-ប្រធានគណៈកម្មការវត្តចែករំលែក៖ កីឡាករអុំទូកតែងហាត់នៅតាមដងព្រែក ដូច្នេះ ត្រូវការកម្លាំងមាំមួននិងសុខភាពល្អ។ ងាយស្រួលបណ្តាកីឡាករសុទ្ធតែជាអ្នកនៅក្នុងឃុំ ម្ល៉ោះហើយ ពេលមានផែនការនិងសេចក្តីប្រកាស គ្រប់គ្នាចូលរួមយ៉ាងគ្រប់គ្រាន់និងអនុវត្តបានហ្មត់ចត់។
ស្មារតីសាមគ្គីនិងការគាំទ្រពីសហគមន៍ដែលបានបង្កលក្ខណៈងាយស្រួលដល់កីឡាករស្ងប់ចិត្តក្នុងការហ្វឹកហាត់។ ស.មង្វៀងធីហឿង-អនុប្រធានគណៈកម្មាធិការប្រជាជនឃុំថាញ់គ្វើយ ឱ្យដឹង៖ នៅលើភូមិដ្ឋានឃុំថាញ់គ្វើយឆ្នាំនេះ បម្រុងនឹងមាន៣ទូកចូលរួម ដោយឡែកចំពោះវត្តព្រែកតាគួនឆ្នាំនេះ នឹងមានទូកបុរសចំនួន២ទូកចូលរួម។ តាមនោះឃើញស្មារតីរបស់បងប្អូនចូលរួមមានភាពសស្រាក់សស្រាំ។ ការចូលរួមរបស់កីឡាករក៏បានគណៈកម្មការវត្តក៏ដូចជាសប្បុរសជនយកចិត្តទុកដាក់និងឧបត្ថម្ភយ៉ាងខ្លាំង។ ជាមួយនឹងស្មារតីនោះ សង្ឃឹមថា បណ្តាកីឡាករនឹងខិតខំប្រឹងប្រែងអស់ពីសមត្ថភាពដើម្បីទទួលបានជ័យលាភីខ្ពស់។
បងអុងវ៉ាំងធ្វឹង គ្រូបង្វឹកក្រុមទូកងវត្តព្រែកតាគួន ចែករំលែកពីក្តីសង្ឃឹមរបស់ខ្លួន៖ ឆ្នាំនេះ យើងខ្ញុំក៏បន្តរក្សាការហ្វឹកហាត់លើបន្ទាដូចរៀងរាល់ឆ្នាំ ដើម្បីលើកកម្ពស់បច្ចេកទេសនិងកម្លាំងមាំមួនរបស់កីឡាករ។ បងប្អូនក្នុងក្រុមមានការសាមគ្គីខ្លាំង តែងតែឧបត្ថម្ភនិងលើកទឹកចិត្តគ្នាទៅវិញទៅមក បង្កឱ្យមានស្មារតីសាមគ្គីខ្ពស់។ យើងខ្ញុំកំពុងខិតខំឱ្យអស់ពីសមត្ថភាពក្នុងពេលហ្វឹកហាត់ ដោយសង្ឃឹមថា នឹងទទួលបានចំណាត់ថ្នាក់ខ្ពស់ រួមចំណែកនាំមកនូវមោទនភាពដល់វត្ត។
ជាមួយការរៀបចំយ៉ាងម៉ត់ចត់ពីកងកម្លាំងកីឡាករដល់បច្ចេកទេសនិងមធ្យោបាយប្រកួត ក្រុមទូកងវត្តព្រែកតាគួន សង្ឃឹមថា នឹងធ្វើបានល្អក្នុងពិធីប្រកួតឆ្នាំនេះ។ ការឯកភាពនិងការខិតខំប្រឹងប្រែងមិនបង្អង់ក្នុងទូទាំងក្រុមគឺជាកម្លាំងជំរុញឈានដល់ការជោគជ័យ។
ពិធីបុណ្យអកអំបុក-ប្រណាំងទូកងសុកត្រាំង មិនត្រឹមតែជាប្រភេទល្បែងកីឡាប៉ុណ្ណោះទេ ថែមទាំងជាឱកាសបង្ហាញពីអត្តសញ្ញាណវប្បធម៌និងស្មារតីសាមគ្គីរបស់សហគមន៍ជនរួមជាតិខ្មែរ។ បណ្តាកីឡាកររបស់វត្តព្រែកតាគួនកំពុងខិតខំរៀងរាល់ថ្ងៃ ដើម្បីនាំមកនូវការសម្តែងដ៏គួរឱ្យជក់ចិត្ត រួមចំណែកដល់ភាពជោគជ័យនៃពិធីបុណ្យប្រពៃណីរបស់ជនរួមជាតិ៕
វឌ្ឍា
Thông tin bạn đọc
Đóng Lưu thông tin